മുഹറം അവധി ഞായറാഴ്ച തന്നെ; തിങ്കളാഴ്ച അവധിയില്ലെന്ന് സർക്കാർ

തിരുവനന്തപുരം: കേരളത്തിൽ മുഹറം അവധി നേരത്തേ പ്രഖ്യാപിച്ച പ്രകാരം ജൂലൈ 6 ഞായറാഴ്ച തന്നെയായിരിക്കുമെന്ന് സർക്കാർ വൃത്തങ്ങൾ അറിയിച്ചു. ജൂലൈ 7 തിങ്കളാഴ്ച അവധി ഉണ്ടായിരിക്കില്ലെന്നും സർക്കാർ വ്യക്തമാക്കി.

ചന്ദ്രമാസപ്പിറവി അനുസരിച്ച് മുഹറം 10 ഈ വർഷം ജൂലൈ 7 തിങ്കളാഴ്ചയാണ് വരുന്നത്. ഇതേത്തുടർന്ന്, തിങ്കളാഴ്ചയും പൊതു അവധി പ്രഖ്യാപിക്കണമെന്ന് ആവശ്യപ്പെട്ട് ടി.വി. ഇബ്രാഹീം എംഎൽഎ ഉൾപ്പെടെയുള്ളവർ മുഖ്യമന്ത്രിക്ക് കത്ത് നൽകിയിരുന്നു. "ചന്ദ്രമാസ പിറവിയുടെ അടിസ്ഥാനത്തിൽ തീരുമാനിക്കുന്ന മുഹറം 10 തിങ്കളാഴ്ചയാണ് കേരളത്തിൽ ആചരിക്കുന്നത്. സർക്കാർ കലണ്ടർ പ്രകാരം ജൂലൈ 6 ഞായറാഴ്ചയാണ് നിലവിൽ അവധിയുള്ളത്. എന്നാൽ മുഹറം 10 ആചരിക്കുന്ന തിങ്കളാഴ്ച സംസ്ഥാനത്ത് പൊതു അവധി പ്രഖ്യാപിക്കണം എന്നാവശ്യപ്പെട്ട് മുഖ്യമന്ത്രിക്ക് കത്ത് നൽകിയിട്ടുണ്ട്. ഫയൽ ജനറൽ അഡ്മിസ്‌ട്രേഷൻ വിഭാഗത്തിന്റെ പരിഗണനയിലാണ്," എന്ന് ടി.വി. ഇബ്രാഹീം എംഎൽഎ ഫെയ്‌സ്ബുക്കിൽ കുറിച്ചിരുന്നു.

എങ്കിലും, നിലവിലെ കലണ്ടർ പ്രകാരമുള്ള അവധിയിൽ മാറ്റമുണ്ടാകില്ലെന്നാണ് സർക്കാർ ഇപ്പോൾ അറിയിച്ചിരിക്കുന്നത്.