പള്ളി വികാരിയെ മരിച്ച നിലയിൽ കണ്ടെത്തി

എരുമപ്പെട്ടി: പള്ളി വികാരിയെ പള്ളിയിലെ കിടപ്പ് മുറിയിൽ മരിച്ച നിലയിൽ കണ്ടെത്തി. തൃശ്ശൂർ എരുമപ്പെട്ടി പതിയാരം   സെൻറ് ജോസഫ്സ് പള്ളി വികാരി പെരിഞ്ചേരി സ്വദേശിയായ ലിയോ പുത്തൂർ (32) ആണ് മരിച്ചത്.

ഇന്ന് ഉച്ചയ്ക്ക് 12.30 യോടെയാണ് സംഭവം. പള്ളിമണിയടിക്കുന്നതിനായി കപ്യാര്‍ വികാരിയെ അന്വേഷിച്ചപ്പോൾ കാണാതിരുന്നതിനെ തുടർന്ന് കൈക്കാരനെ വിവരമറിയിക്കുകയായിരുന്നു. തുടർന്ന് പള്ളിയോടു ചേർന്നുള്ള വികാരിയച്ചൻ്റെ കിടപ്പുമുറിയിലെ ജനലിലൂടെ നോക്കിയപ്പോഴാണ് അച്ചൻ തൂങ്ങി നിൽക്കുന്നതായി കണ്ടത്.

ഉടൻ തന്നെ പള്ളി ജീവനക്കാരും നാട്ടുകാരും എരുമപ്പെട്ടി പൊലീസിൽ വിവരമറിയിച്ചു. പൊലീസ് സ്ഥലത്തെത്തി മേൽ നടപടികൾ സ്വീകരിച്ചു.

ആറ് വർഷം മുൻപാണ് ഫാദർ ലിയോ പുത്തൂർ പട്ടം സ്വീകരിച്ചത്. കഴിഞ്ഞ ഒക്ടോബർ 22നാണ് ലിയോ പുത്തൂർ പതിയാരം പള്ളിയിൽ വികാരിയച്ചനായി ചാർജ്ജെടുത്തത്. ആദ്യമായി വികാരിയച്ചനായെത്തിയത് എരുമപ്പെട്ടി പരിയാരം പള്ളിയിലാണ്.