പരിപാടി കഴിഞ്ഞ് ജനക്കൂട്ടത്തിനിടയിലൂടെ പുറത്തേക്കിറങ്ങുകയായിരുന്ന വേടന് അപ്രതീക്ഷിതമായി ഒരു യുവതി സമ്മാനപ്പൊതിയുമായി അടുത്തു. സാധാരണ ലഭിക്കുന്ന സമ്മാനങ്ങളിലൊന്നായിരിക്കുമെന്ന് കരുതി വേടൻ അത് തുറന്നു. എന്നാൽ, ആ നിമിഷം വരെ ആവേശത്തിൽ കണ്ട വേടനായിരുന്നില്ല പിന്നീട്. അയാളുടെ കണ്ണുകൾ നിറഞ്ഞു, മുഖത്ത് സങ്കടം തളംകെട്ടി. ഓർമ്മകൾ അയാളെ വല്ലാതെ പൊതിഞ്ഞു.
സമ്മാനപ്പൊതിയിൽ മുക്കം മണാശ്ശേരിക്കാരിയായ മെഹ്റൂജ ഫ്രെയിം ചെയ്ത് നൽകിയത്, വേടന്റെ ഓർമ്മകളിലുള്ള അമ്മ ചിത്രയുടെ പഴയൊരു ഫോട്ടോയായിരുന്നു. 2020-ൽ കോവിഡ് കാലത്ത് മൂന്നുമാസത്തോളം വേടന്റെ അമ്മ മെഹ്റൂജയുടെ മണാശ്ശേരിയിലെ വീട്ടിൽ താമസിച്ചിരുന്നു. നാട്ടിലേക്ക് മടങ്ങുമ്പോൾ കോഴിക്കോട് മൊഫ്യൂസിൽ ബസ് സ്റ്റാൻഡിൽ കൊണ്ടുവിടുന്നതിനിടെ ഒപ്പമെടുത്ത സെൽഫിയിൽ നിന്നുള്ള അമ്മയുടെ ചിത്രമാണ് മെഹ്റൂജ വേടന് സമ്മാനിച്ചത്. നാല് മാസമായി ഈ സമ്മാനം നൽകാൻ കാത്തിരിക്കുകയായിരുന്നുവെന്ന് മെഹ്റൂജ പറഞ്ഞു. വേടനെ മുൻപ് നേരിട്ട് കണ്ടിട്ടില്ലെന്നും, കോഴിക്കോട് എത്തുന്നുണ്ടെന്നറിഞ്ഞപ്പോൾ അച്ഛൻ മുരളീദാസാണ് വേദിയിൽ പോയി നൽകാൻ പറഞ്ഞതെന്നും അങ്ങനെയാണ് മണാശ്ശേരിയിൽ നിന്ന് എത്തിയതെന്നും മെഹ്റൂജ കൂട്ടിച്ചേർത്തു.
അമ്മയുടെ ചിത്രം നെഞ്ചോട് ചേർത്ത്, നിറഞ്ഞ കണ്ണുകളോടെ വേടൻ ആ വേദി വിട്ടു. ഒപ്പം, നന്ദിയുടെയും സ്നേഹത്തിന്റെയും ഒരായിരം ചിരി മെഹ്റൂജക്ക് സമ്മാനിക്കുകയും ചെയ്തു.
0 Comments
Please be respectful in your comments. We do not tolerate any form of hate speech, harassment, or personal attacks. Comments that violate our community guidelines will be removed.